Merendina

لتحضير الجنواز نحتاج : 4 بيضات كاس ماعامرش سنيدة كاس فورص معلقة صغيرة خمارة الحلوى قشور الحامض

اولا نطربو بياض البيض مع نصف كاس سنيدة حتى يولي بحال الثلج نخليوه على جنب

ثم نطربو اصفر البيض مع قشور الحامض ونص كاس سنيدة اللي بقا مين يطرب مزيان نحيدو لباطور ونكملو غي بيدينا

نضيف الدقيق المغربل مع الخمارة

في الاخير نضيف ابيض البيض ونخلط بمعلقة خشبية من اسفل لاعلى

ننقص ربع من الخليط فايناء نضيف ليه معلقة صغيرة كاكاو ونخلط لكل

نفرش فطاوة بابيي سولفغيزي نبسط خليط لكاكاو كطقة اولى من بعد نبقى نهز شوية من الخليط الابيض بمعلقة خشبية او نبسط فوق خليط لكاكاو شوية بشوية

حتى نساليو ندخل طاوة لفرن نكونو مشعلين عليه من قبل نقصو العافية راه لجنواز دغيا تطيب عكس لكيك

مين طيب نقلبوها فوق منديل نحيدو ليها لجوانب بلموس

نقسموها على 2 نقلبو النصف الاول نديرو الخليط الابيض من فوق نسقيه بسيرو اللي نكونو موجدينو من قبل 3 معالق صغار عصير الحامض 5 معالق صغار سنيدة نص كاس الماء نوضعو لكل فوق النار حتى يغلى

نوجدو لكريمة فكاسرول نوضعو معلقة كبيرة زبدة 5 مربعات شكلاط نص معلقة صغيرة فورص معلقة كبيرة كاكاو2 معالق سنيدة ربع كاس حليب نص معيلقة نيسكافي نوضو لكل فوق النار مين يعقاد نضيف ليه دانون صغير ديال درهم الشكلاط ندهن النصف الاول الجنواز

ثم نغطيها بالنصف الثاني تكون هاد المرة الجهة البنية من فوق نسقيها بالسيرو تقطع حسب الشكل المرغوب به

نذوب الشكلاط الاسود على طريقة حمام مريم مع معيلقة زبدة ناخد طريفات الجنواز اللي قطعنا نوضعوهم فوق شي شبيكة نبداو نكبو خليط الشكلاط من فوق حتى يتغطاو

نحطوهم فوق شي بلاطو او طبسيل مفرش ببلاستيكة باش مين ينشفو يتحيدو لينا بسهولة

نعمل لهم خطوط من فوق بالشكلاط الاسود او الابيض انا فضلت نعمل خطوط بياغوت شكلاط باش يجي لون مختلف وانتم لكم الاختيار ونقدمها فطبق

هدا شكلها من الداخل كيف شفتو اللون البني فالاسفل و الاعلى

بالصحة و الراحة